Horyaalka La Liga ee Spain ayaa wajahaya khasaare dhaqaale oo weyn, kaddib muran ka dhashay hadallo loo nisbeeyay xiddiga Real Madrid iyo xulka Faransiiska, Kylian Mbappé, oo la xiriira hoggaamiyihii hore ee Shiinaha, Mao Zedong.
Warbixinta ay baahisay warbaahinta Btolat ayaa sheegaysa in telefishinka dowladda Shiinaha uu joojiyay baahinta kulamada La Liga, halka shirkado dhowr ah ay soo afjareen heshiisyadii xayeysiiska ee ay la lahaayeen Mbappé.
Sida laga soo xigtay warbaahinta Touchline, khasaaraha dhaqaale ee kubadda cagta Spain wuxuu gaari karaa 100 milyan oo Yuuro xilli ciyaareedkii. Xuquuqda baahinta telefishinka Shiinaha ayaa lagu qiyaasay 50 milyan oo Yuuro sanadkii, iyadoo khasaaraha intiisa kale laga filayo heshiisyada xayeysiiska iyo iskaashiga ganacsi.
La Liga ayaa ka cabsi qabta in xaaladdu la mid noqoto tii NBA-da, oo muddo ku dhow laba sano iyo bar laga waayay telefishinnada Shiinaha.
Si loo yareeyo xiisadda loona ilaaliyo danaha ganacsi ee horyaalka, madaxweynaha La Liga, Javier Tebas, ayaa kulan la yeeshay safiirka Shiinaha.