Halyeeygii hore ee Manchester United, Gary Neville, ayaa sheegay in xukunkii lagu helay Manchester City uu dhaawac weyn u geysanayo sumcadda Premier League, isaga oo ka digay in horyaalka Ingiriiska uu mustaqbalka la kulmi karo xaalad la mid ah tii Serie A-da Talyaaniga kadib fadeexaddii Calciopoli.
Neville ayaa sheegay in dhacdadan aysan ahayn arrin lagu farxo, balse ay tahay xaalad uu si dhab ah uga walaacsan yahay, maadaama Premier League uu yahay mid ka mid ah waxyaabaha ugu caansan ee Ingiriisku dunida u dhoofiyo.
Isagoo ka hadlayay barnaamijka Stick to Football, Neville wuxuu tilmaamay in kubadda cagta Talyaanigu ay si weyn u dhaawacantay kadib fadeexaddii Calciopoli ee 2006, taas oo lagu eedeeyay kooxo Talyaani ah inay saameyn ku lahaayeen garsoorayaasha, waxaana Juventus laga qaaday koobab laguna diray Serie B.
Neville wuxuu sheegay inuusan oranayn Premier League ay qasab tahay inay ku dambayso xaaladdaas, balse uu ka digayo in sumcadda horyaalka ay dhaawacmi karto haddii fadeexadda Manchester City ay sii socoto:- “Hadda waxaa dalka iyo horyaalkeenna kusoo dhacay arrintan. Premier League waa waxa ugu weyn ee dalkeenna dunida u dhoofiyo,” ayuu yiri Neville.
Wuxuu intaas ku daray in marka dunida laga hadlo Liverpool, Manchester United, Arsenal iyo kooxaha kale ee waaweyn, inta badan lagu xiro magaca Premier League. “Waqtigan xaadirka ah, waxaa nala jiidayaa dhoobo,” ayuu Neville ku sheegay hadalkiisa, isaga oo tixraacaya dhaawaca sumcadeed ee uu sheegay in horyaalka uu wajahayo.
Manchester City ayaa weli qorsheynaysa inay racfaan ka qaadato go’aanka, halka cunaqabataynta ama tallaabooyinka kale ee laga yaabo in laga qaado kooxda ay weli sugayaan. Sidaas darteed, arrintu waxay u muuqataa inay sii socon doonto muddo.
Dhanka kale, dooddu waxay gaartay heer siyaasadeed kadib hadal uu jeediyay Andy Burnham, oo muujiyay inuu ka walaacsan yahay in Manchester City ay lumiso milkiilayaasheeda Abu Dhabi. Hadalkaas ayaa dhaliyay dhaleeceyn, iyadoo qaar ka mid ah falanqeeyayaasha ay ku tilmaameen mid aan si fiican uga tarjumayn culayska xukunka.
Neville ayaa sidaas darteed ka digaya in haddii muranka Manchester City uu sii dheeraado, uu saameyn ku yeelan karo sida Premier League looga arko gudaha iyo dibadda England.