Cristiano Ronaldo ayaa go’aan ka gaaray mustaqbalkiisa xulka qaranka Portugal, isagoo caddeeyay inuusan xilligan ka fariisanayn ciyaaraha caalamiga ah, isla markaana uu diyaar u yahay inuu mar kale u ciyaaro dalkiisa.
Ronaldo ayaa sheegay in uu markii hore qorsheynayay inuu soo saaro fariin uu shacabka Portugal ugu sheego inuu ka fariisanayo xulka qaranka, balse xaaladda ayaa is beddeshay kadib markii madaxweynaha xiriirka kubadda cagta Portugal uu ka codsaday inuu sii joogo xulka, Xiddiga reer Portugal ayaa sidoo kale sheegay inuu taageeray magacaabista Jorge Jesus oo loo doortay tababaraha cusub ee xulka Portugal.
Ronaldo wuxuu sheegay in Jorge Jesus uu u sheegay inuu ku tiirsan yahay, balse uu ka codsaday inuusan u safrin kulamadii Portugal ay la ciyaaraysay Norway iyo Denmark, Arrintaas ayuu Ronaldo diiday, isagoo ku adkaystay inuu yahay kabtanka xulka qaranka, isla markaana uu doonayo inuu u diyaar ahaado dalkiisa.
Kulankii Norway, Ronaldo wuxuu sheegay in loo sheegay inuu diyaar u noqdo inuu ciyaaro qiyaastii 30 daqiiqo. Wuxuu sheegay inuu qeybtii labaad si joogto ah u kululeynayay, balse ugu dambeyn aan la gelin ciyaarta.
Ronaldo ayaa sheegay in tababaruhu uu jebiyay ballan uu kula galay, iyadoo sidoo kale aan la fulin heshiiskii ahaa in arrintaas lagu sharxo shir jaraa’id.
Sida uu sheegay Ronaldo, dhacdooyinkaas ayaa sababay inuu dareemo in kalsoonidii ay dhaawacantay, taasoo keentay inuu ka tago xerada xulka, Wuxuu qirtay inuu isagu mas’uuliyadda buuxda ka qaadanayo go’aanka uu ku baxay, isagoo sidoo kale sheegay inuu diyaar u yahay inuu aqbalo ciqaab kasta oo lagu soo rogo.
Ronaldo wuxuu adkeeyay in xeerarka ay tahay in si siman loogu dabaqo dhammaan ciyaartoyda, isaga oo aan dalbanayn in loo sameeyo wax ka reeban, Ronaldo wuxuu sidoo kale meesha ka saaray fikradda ah inuu hadda qabanayo ciyaar sagootin ah.
Wuxuu sheegay in ujeeddadiisu aysan ahayn inuu sameeyo xaflad sagootin ah, balse uu weli doonayo inuu tartamo, ciyaaro oo uu guuleysto.
“Ma fikirayo ciyaar sagootin ah,” ayuu fariintiisa ku sheegay, isagoo tilmaamay inuu weli doonayo inuu u dagaallamo Portugal.
Qodobka ugu weyn ee fariintiisa ayaa ah in Ronaldo uusan xirayn albaabka xulka qaranka, Wuxuu sheegay in haddii uu jir ahaan diyaar yahay, uu kooxdiisa u ciyaarayo isla markaana uu goolal dhalinayo, uu diyaar u noqon doono inuu mar kale u soo laabto xulka Portugal marka uu dhammaado muddada ciqaabta.
Ronaldo ayaa sidaas ku caddeeyay inuu weli doonayo inuu xirto funaanadda Portugal, isagoo sheegay inuu sii wadi doono dagaalka iyo tartanka uu ugu jiro dalkiisa.
Go’aanka Ronaldo wuxuu meesha ka saaray wararkii la xiriiray inuu si degdeg ah uga fariisanayo ciyaaraha caalamiga ah. Haddii uu caafimaad ahaan diyaar yahay oo uu dhammeysto ciqaabta lagu soo rogo, wuxuu qorsheynayaa inuu dib ugu soo laabto xulka Portugal marka la gaaro fasaxa xulalka ee bisha November.