Bruno Fernandes ayaa qandaraas cusub u saxiixay Manchester United laakiin kabtanka ayaa daaha ka qaaday inuu helay dalabyo xiiso badan si uu uga Tago Old Trafford.
Waxaa la shaaciyay fiidnimadii Arbacada in Fernandes uu qalinka ku duugay heshiis cusub oo United ku sii hayn doona ilaa 2027.
In kasta oo 29-sano jirkaan uu muhiim ugu ahaa Red Devils tan iyo markii uu lacag badan ka soo qaatay Sporting Lisbon bishii January 2020, waxaa loo maleynayay in nidaamka cusub ee INEOS uu u furan yahay inuu iibiyo khadka dhexe ee weerarka xagaagan.
Wararka ayaa soo jeedinaya in kooxaha sida Bayern Munich, PSG iyo Saudi Pro League ay xiiseynayeen xiddiga reer Portugal kaasoo si rasmi ah kabtanka United looga dhigay xagaagii hore.
Waxaana ay u muuqataa in wararkaas ay xaqiiqo ahaayeen iyada oo Fernandes qudhiisa uu shaaca ka qaaday inuu helay dalabyo uu kaga tagayo kooxda laakiin mar walba uu qalbigiisa ku jiray inuu sii joogo Manchester.
“Codkan kalsoonida ee kooxda aad ayay muhiim iigu ahayd,” ayuu u sheegay ESPN Brazil.
“Xitaa sababtoo ah waxaa ila soo xiriiray [kooxaha kale], kooxdu waxay ka warqabtay inay jirto suurtagalnimada inaan baxo, waxaan helay dalabyo la taaban karo”.
“Laakiin kooxdu waxay muujisay inay ii baahan tahay, inay ahayd wakhti isbedel iyo inay rabaan inay wax u qabtaan si ka duwan”.
Be the first to comment