Cristiano Ronaldo ayaa mar kale noqday mowduuca hadal-heynta kadib khilaafkii dhawaan dhex maray isaga iyo tababaraha xulka Portugal, Jorge Jesus, kaas oo sababay in xiddiga reer Portugal uu ka tago xerada xulka.
Portugal ayaa ciyaar adag 3–2 kaga adkaatay Denmark kulan ka tirsanaa wareegga saddexaad ee tartanka UEFA Nations League 2027, Ronaldo ayaan ciyaarta ka qaybgelin kulankii Portugal iyo Norway, waxaana uu kulanka oo dhan ku jiray kursiga keydka, kadib go’aan uu qaatay tababare Jorge Jesus. Arrintaas ayaa la sheegay inay ka careysiisay kabtanka Portugal.
Kadib dhacdada, Ronaldo wuxuu kulan la qaatay madaxda xiriirka kubadda cagta Portugal iyo Jorge Jesus, waxaana la sheegay in khilaafka labada dhinac la xaliyay, Si kastaba, muuqaal lagu baahiyay baraha bulshada ayaa muujiyay Ronaldo oo ka baxaya xarunta tababarka xulka Portugal, kadib shir jaraa’id uu qabtay Jorge Jesus.
Ronaldo ayaa sidoo kale qoraal xooggan ku daabacay akoonkiisa Instagram, kaas oo loo fasirtay inuu tilmaamayo suurtagalnimada inuu ka fariisto ciyaaraha caalamiga ah:- “Ronaldo si ka duwan Messi ayaa loola dhaqmaa”
Sida ay soo xigatay warbaahinta AS, Ronaldo ayaa jeclaaday qoraal uu Instagram-ka ku daabacay ciyaaryahankii hore ee Brazil Felipe Melo, kaas oo ka hadlayay sida Ronaldo loola dhaqmo marka loo eego Lionel Messi, Melo ayaa sheegay inuu arko farqi weyn oo u dhexeeya sida xulka Portugal ula dhaqmo Ronaldo iyo sida ciyaartoyda Argentina ula dhaqmaan Messi.
Wuxuu tusaale u soo qaatay dhacdo uu ciyaaryahan Napoli ah si weyn uga carooday kadib markii uu dhaliyay gool, isaga oo xusay in ciyaartoygaasi uu xitaa Jorge Jesus ka riixay, Melo wuxuu sidoo kale sheegay in Ronaldo uu mudan yahay ixtiraam weyn, isagoo ku dooday in aysan jirin ciyaaryahan kale oo xulka Portugal ah oo la heer ah kabtanka:- “Ma aha wax la aqbali karo in ciyaaryahanka ugu weyn Portugal sidan looga tago,” ayuu yiri Melo.
Wuxuu intaas ku daray inuu si cad u taageerayo Ronaldo marka la barbar dhigo Jorge Jesus, balse uu diyaar u yahay inuu qirto inuu khaldan yahay haddii la caddeeyo in Ronaldo uu isagu ahaa qofka khaladka lahaa ama bixitaankiisu ahaa mid hore loogu heshiiyay.
Waxa hadalka sii xoogeysay ayaa ahayd in Cristiano Ronaldo uu jeclaaday qoraalka Felipe Melo. Arrintaas ayaa keentay in taageerayaal iyo warbaahin badan ay u fasiraan inay muujinayso in Ronaldo uu ka xumaaday sida qaar ka mid ah ciyaartoyda xulka Portugal ula dhaqmeen, Khilaafka Ronaldo iyo Jorge Jesus ayaa sidaas darteed weli sii wada hadal-heynta, inkastoo labada dhinac ay hore u yeesheen kulan lagu sheegay in arrinta lagu xaliyay.