Tababaraha xulka qaranka Portugal, Jorge Jesus, ayaa markii ugu horreysay ka hadlay go’aanka lama filaanka ah ee Cristiano Ronaldo uu kaga fariistay ciyaaraha heerka caalamiga ah, isagoo sheegay inuusan wax mas’uuliyad ah ka dareemayn go’aanka xiddiga reer Portugal.
Ronaldo oo 41 jir ah ayaa Khamiistii ku dhawaaqay inuu soo afjaray waayihiisii ciyaareed ee xulka qaranka Portugal, kaddib 23 sano oo uu matalayay dalkiisa, waxaana go’aankan uu yimid xilli uu khilaaf kala dhexeeyay tababare Jorge Jesus.
Khilaafka labada dhinac ayaa sii xoogaystay kaddib markii Ronaldo kursiga keydka loo fariisiyay kulankii Portugal ay la ciyaartay Norway, inkastoo uu kulankaas isku diyaarinayay inuu garoonka galo. Arrintaasi waxay dhalisay muran dhexmaray ciyaaryahanka iyo tababaraha, iyadoo Ronaldo markii dambe uu ka baxay xerada tababarka xulka.
Isagoo ka hadlayay go’aanka Ronaldo, Jorge Jesus ayaa sheegay inuusan ogeyn inuu ciyaaryahanku qorsheynayay inuu ka fariisto xulka qaranka.
“Waxaan warka ku ogaaday isla waqtigii aad adinkuna ogaydeen. Ilaa waqtigaas waxba kama aanan ogeyn. Wuxuu ciyaarayay, goolalna wuu dhalinayay, wuxuuna ka mid ahaa ciyaartoyda aan qorsheynayay inaan xulka ugu yeero,” ayuu yiri Jorge Jesus.
Tababaraha ayaa sidoo kale meesha ka saaray inuu dareemayo mas’uuliyadda go’aanka Ronaldo.
“Wax dambi ah kama dareemayo ka tagistiisa. Waxaan ixtiraamayaa go’aankiisa, taariikhdiisana lama iska indho tiri karo. Wuxuu mar walba ahaan doonaa astaan weyn,” ayuu raaciyay.
Jorge Jesus ayaa sidoo kale sheegay in isaga iyo Ronaldo ay muddo saaxiibtinimo wanaagsan lahaayeen, isagoo xusay inay muddo sannad iyo bar ah xiriir dhow lahaayeen, gaar ahaan xilligii uu tababaraha u ahaa kooxda Al-Nassr ee Sacuudiga.
Dhanka kale, Ronaldo ayaa xulka Portugal u ciyaaray 234 kulan, wuxuuna u dhaliyay 146 gool, isagoo noqday ciyaaryahanka ugu goolasha badan taariikhda ciyaaraha caalamiga ah ee ragga.
Wuxuu sidoo kale Portugal kula guuleystay koobkii Qaramada Yurub ee 2016 iyo laba koob oo UEFA Nations League ah, sannadihii 2019 iyo 2025.
Inkasta oo uu ka fariistay xulka qaranka, Ronaldo weli kama uusan fariisan kubadda cagta, waxaana la filayaa inuu sii wato ciyaaraha heerka kooxeed ee Al-Nassr.
Go’aankiisa ayaa soo afjaray mid ka mid ah waayihii ugu dheeraa uguna guulaha badnaa taariikhda xulka Portugal.