Rio Ferdinand ayaa shaaca ka qaaday labada khalad ee ugu weyn suuqa kala iibsiga ee Man Utd.
Daafacii hore ee Manchester United, Rio Ferdinand, ayaa shaaca ka qaaday “khaladkii ugu weynaa ee suuqa kala iibsiga” ee kooxda Premier League-ga ka dhigay tan iyo markii Sir Alex Ferguson uu ka fariistay.
Kooxda Red Devils ayaa hoos u dhacday tan iyo markii Fergie uu shaqada ka tagay sanadkii 2013.
Tan iyo waqtigaas, United ma aysan ku guuleysan horyaalka, waxaana ay xilli ciyaareedkii hore ku dhammeysatay kaalinta 15-aad.
Ferdinand ayaa farta ku fiiqay khaladaadka ka jira qaadashada ciyaartoyda cusub ee Old Trafford.
Wuxuu sheegay in United ay “meel kale joogeen” haddii ay la saxiixdeen Harry Kane iyo Declan Rice.
Kane wuxuu Tottenham uga tagay Bayern Munich, halka Arsenal ay Rice ku qaadatay £105m.
“Taasi waa khaladka ugu weyn ee ay sameeyeen 10-kii sano ee la soo dhaafay,” ayuu yiri Ferdinand isagoo ka hadlayay kanaalkiisa YouTube.
“Si daacad ah ayaan u aaminsanahay oo waxaan hubaa in haddii Man United ay qortay Harry Kane iyo Declan Rice suuqaas, maanta meel kale ayay joogeen.”
Be the first to comment