Wargeyska “Sport” ee dalka Spain ayaa sheegay in Real Madrid ay u sheegtay Liverpool inaysan qorshe u lahayn inay la saxiixdaan daafaca Faransiiska Ibrahima Konaté, kaas oo qandaraaskiisu ku egyahay Juun 2026, inkasta oo uu ciyaaryahanku xiiseynayo inuu u wareego kooxda reer Spain isla markaana uu diiday inuu heshiis cusub u saxiixo Liverpool ilaa hadda.
Wargeysku wuxuu intaas ku daray in kooxda boqortooyadu ay ka heshay astaamaha Konaté sida khibraddiisa iyo awoodda uu u leeyahay inuu kubadda ka bilaabo gadaasha, balse waa ciyaaryahan lugta midig ku badan, halka Real Madrid ay doorbideyso inay la saxiixato daafac bidix oo noqda beddelka David Alaba oo heshiiskiisu dhamaanayo xagaaga soo socda. Xaaladdan oo kale, Huesen ayaa noqonaya daafaca keliya ee dabooli kara garabka bidix.
Warbixintu waxay sidoo kale sheegtay in suuragalnimada heshiis kordhinta Antonio Rüdiger, oo 32 jir ah, ay xoojisay go’aanka kooxda ee ah inay ka harraan Konaté, maadaama daafaca Jarmalka ahi doonayo inuu sii joogo kadib markii uu laba xilli-ciyaareed oo isku xiga caddeeyey inuu yahay hoggaamiye difaac, inkasta oo uu helayo dalabyo lacageed oo waaweyn oo ka imanaya horyaalka Carabta.
Wargeysku wuxuu tilmaamay in Konaté weli ku jiro liiska kooxaha kale ee isha ku haya, maadaama uu yahay ciyaaryahan si weyn loo doonayo. Waxa uu 2021 ugu biiray Liverpool isagoo ka yimid RB Leipzig lacag dhan 35 milyan oo euro, wuxuuna sameeyaa lamaane difaac oo joogto ah Virgil van Dijk, kaas oo gaari doona 35 sano xagaaga soo socda iyadoo hal sano u haro qandaraaskiisa.
Warbixintu waxay ku dartay in ciyaaryahanku aad ugu faraxsanaa suurtagalnimada uu ugu biiri karo Real Madrid si uu ugu ciyaaro agagaarka Tchouaméni, Camavinga, Mendy, iyo gaar ahaan Kylian Mbappé, kaas oo si joogto ah ula xiriirayay. Si kastaba ha ahaatee, Real Madrid waxay meesha ka saartay saxiixiisa waxayna doorbideysaa inay raadsato daafac bidix oo dhallinyaro ah oo mustaqbal wanaagsan leh.
Be the first to comment