Halyeeygii hore ee Liverpool, Emile Heskey, ayaa sheegay in Mohamed Salah uu xagaagan ku biiri karo Saudi Pro League.
Salah ayaa heshiis cusub u saxiixay Liverpool kaasoo ku kordhiyay joogitaankiisa Anfield labo sano oo dheeraad ah, taasoo ka dhigeysa inuu sii joogo ilaa xagaaga 2027. Si kastaba ha ahaatee, iyadoo uu la daalaa dhacayo qaab ciyaareed aan fiicneyn xilli ciyaareedkan, warar xan ah ayaa weli hareeyay mustaqbalkiisa.
Warbixin ay daabacday BBC Sport ayaa sheegtay in Salah uu “si sii kordheysa ugu dhow yahay” inuu ka tago Liverpool xagaagan, labo bilood kaddib markii uu sheegay in isaga iyo tababare Slot “aysan wax xiriir ah lahayn” isla markaana uu ku eedeeyay kooxda inay “baska hoostiisa ku tuurtay”.
Isagoo la hadlayay OLBG, Heskey wuxuu aaminsan yahay in u wareegista Sacuudiga ay ku habboonaan karto xiddiga reer Masar, kaasoo haatan ah ciyaaryahanka ugu mushaharka badan Liverpool.
“Ma u wareegi karaa Mohamed Salah koox sida Barcelona, Real Madrid ama Bayern Munich halkii uu ka aadi lahaa Sacuudiga? Qof walba wuu jeclaan lahaa inuu halkaas aado, waan hubaa inuu isaguna jeclaan lahaa, laakiin qofku wuxuu qaataa waxa hortiisa yaalla”
“Haddii waddada Salah ay tahay Sacuudiga, waan aragnay Cristiano Ronaldo oo wali goolal ka dhalinaya halkaas. Waxaad arkeysaa Ivan Toney oo wali goolal dhalinaya. Sadio Mane ayaa halkaas jooga. Ma jirto sabab aadan uga ciyaari karin Sacuudiga adigoo weli wax soo saar ka sameynaya heer caalami”
“Wax walba waxay ku xiran yihiin waxa isaga ku habboon. Marka aad sameyso wixii uu isagu sameeyay, anaga taageerayaal ahaan waa inaan aqbalnaa go’aankiisa. Waan aqbalnaa waana jecelnahay waxa uu u qabtay kooxda. Marka aad eegto tirakoobyada uu sameeyay, cidna wax kama oran karto.”
Waxaa la rumeysan yahay inuu qaato £400,000 toddobaadkii Anfield, taasoo ka dhigan in haddii uusan doonayn inuu mushahar dhimasho sameeyo, Saudi Pro League ay noqon karto fursadda kaliya ee macquulka ah marka la eego suuqa kala iibsiga ee mashquulka badan ee xagaagan u furmi doona horyaalka Premier League.
Be the first to comment