Marcus Rashford ma laha wax niyad ah oo uu ugu laabanayo Manchester United, wuxuuna raadin doonaa inuu ku biiro koox kale haddii Barcelona aysan si rasmi ah (heshiis joogto ah) u la wareegin.
Rashford ayaa ku jira waqti amaah ah oo guul leh Nou Camp, isagoo dhaliyay sagaal gool isla markaana bixiyay sagaal caawin kooxda horyaalka Spain difaacaysa.
Ruben Amorim ayaa oggolaaday amaahda Rashford ee Aston Villa xilli-ciyaareedkii hore, wuxuuna sidoo kale rabay in weeraryahanku mar kale baxo xagaaga.
Rashford ayaa si weyn ugu faraxsan nolosha Barca, wuxuuna si gaar ah u doonayaa inuu saxiixo heshiis joogto ah oo uu la galo kooxda hoggaamineysa La Liga, isla markaana si nabad ah ugu gudubtay wareegyada bug-bixinta ee Champions League.
Markii ay Barcelona Rashford amaah ku soo qaadatay, waxay la heshiisay qodob u oggolaanaya inay si joogto ah ula wareegto xiddiga kasoo baxay akadeemiyadda Manchester United, iyadoo qiimuhu ku dhow yahay £30 milyan.
Mas’uuliyiinta go’aamada ka gaara Nou Camp ayaa aad ula dhacay saameynta uu Rashford ku yeeshay kooxda, balse ma gaari doonaan go’aan kama dambeys ah oo ku saabsan mustaqbalkiisa ilaa uu soo dhowaado suuqa kala iibsiga xagaaga.
Xaaladda xiddiga 28-jirka ah ayaa sii murugsantay kaddib eryidda Amorim iyo magacaabista Michael Carrick oo noqday tababare ku-meel-gaar ah.
Waxaa toddobaadkii hore la sheegay in Michael Carrick uu doonayay inuu Marcus Rashford dib ugu soo dhaweeyo Old Trafford haddii loo magacaabo tababare rasmi ah.
Laakiin wargeyska Daily Mirror ayaa sheegaya in Rashford uu horay u go’aansaday in mustaqbalkiisu uusan ku jirin Manchester United, isla markaana uu Barcelona u sheegay rabitaankiisa ah inuu halkaas sii joogo.
Natiijadaas darteed, Rashford wuxuu raadin doonaa xulashooyin kale haddii Barca ay go’aansato inaysan sii haysan, halkii uu dib ugu laaban lahaa kooxda uu ku biiray markii uu jiray siddeed sano.
Be the first to comment