Liverpool waxay gaareen go’aankooda ku saabsan mustaqbalka Arne Slot kaddib guuldarradii musiibada ahayd ee ka dhacday PSV kulankii Champions League.
Habeenkii Champions League ee xalay, Liverpool waxay la kulantay mid ka mid ah guuldarrooyinkeedii ugu xumaa tan iyo inta uu Slot xilka hayay, kadib markii kooxda reer Holland ee PSV Eindhoven ay 4-1 ku garaacday Kulan ka tirsanaa Champions League kana dhex dhacday garoonka Anfield.
Taas micnaheedu waxa weeye in Liverpool hadda laga dhaliyay toddobo gool, iyagoo dhaliyay hal gool kaliya saddexdii guuldarro ee xiriirka ahaa, laba ka mid ahna ay ka dhaceen garoonkooda.
Guuldarro foolxun oo noocaas ah ayaa cadaadis dheeri ah saaraysa macallinka Liverpool, Arne Slot, kaasoo wajahaya hubanti la’aan ku saabsan mustaqbalka shaqadiisa, xilli ay weli kasoo wareegtay oo keliya toddobo bilood intii uu ku guuleystay horyaalka Premier League.
Laakiin hadda, tababaraha reer Holland ayaa loo sheegay go’aanka ay guddida Liverpool ka gaareen mustaqbalkiisa, ka hor kulankooda soo socda ee ay la ciyaarayaan West Ham United.
Kaddib guuldarradii ka dhacday PSV, Slot wuxuu qirtay inuusan ka walwalin booskiisa, balse uu u baahan yahay inuu si ka fiican u shaqeeyo kulamada soo socda.
Wuxuu yiri: “Maya, kama walwalsani. Fekerkeygu wuxuu ku jiraa waxyaabo kale oo aan ka ahayn in aan ka walwalo booskeyga. Waa inaan si ka wanaagsan u shaqeeyaa.”
Sida laga soo xigtay warbixin ay baahisay Mail Sport, rajo wanaagga Slot waa mid sabab leh maadaama uu weli haysto taageerada madaxda sare ee Liverpool, kuwaas oo aaminsan inuu awood u leeyahay inuu ka soo kabto natiijooyinka liita ee kooxda.
Weriyaha Liverpool, Lewis Steele, ayaa sheegay in ilo ku dhow kooxda iyo Slot labadaba ay xaqiijiyeen subaxnimadii maanta in booskiisa tababarenimo uu ammaan yahay, isla markaana guuldarradii PSV aysan wax saameyn ah ku yeelan.
Be the first to comment