Kooxaha Liverpool FC iyo Galatasaray ayaa u diyaar garoobaya ciyaarta wareegga 16-ka ee UEFA Champions League maalinta salaasada, iyadoo Liverpool ay maqnaan doonaan 6 ciyaaryahan oo muhiim ah.
Kooxda reer Turkiga ayaa 1-0 ku garaacday Liverpool bishii Sebtembar 2025, waxaana tababaraha Liverpool Arne Slot uu doonayaa inuu ka aar-guto kulankaas markan, iyagoo doonaya inay u gudbaan Quarter Final-ka.
Ciyaaryahanka Florian Wirtz ayaa laga yaabaa inuu ku soo laabto safka hore ee Liverpool marka ay la ciyaarayaan Galatasaray berri, kadib markii uu maqnaa saddexdii kulan ee ugu dambeeyay sababo la xiriira dhaawac dhabarka ah oo ka soo gaaray kululaan-sameynta ka hor guushii 1-0 ee ay ka gaareen Nottingham Forest.
Si kastaba ha ahaatee, Liverpool waxay dhibaato ku qabaan difaaca, sababtoo ah labada ciyaaryahan ee Conor Bradley iyo Giovanni Leoni ayaa dhaawac jilibka ah ku maqan. Taas waxay ka dhigan tahay in Jeremie Frimpong, Ibrahima Konaté iyo Virgil van Dijk ay difaaca hoggaamin doonaan toddobaadkan.
Sidoo kale goolhayaha Alisson Becker iyo weeraryahanka Federico Chiesa ma safri doonaan Istanbul, kadib markii laga saaray liiska safarka kooxda. Sidaas darteed goolhayaha Giorgi Mamardashvili ayaa la filayaa inuu goolka qabto.
Ciyaaryahanka khadka dhexe Wataru Endo (dhaawac canqow iyo cag) sidoo kale wuu maqan yahay, waxaana la mid ah saxiixii xagaaga Alexander Isak oo qaba dhaawacyo lugta ah. Tababare Slot ayaa sheegay in Isak ugu yaraan bisha soo socota bilowgeeda la filayo inuu soo laabto marka uu sii wado soo kabashada.
Liverpool waxay 5 gool laga dhaliyay saddexdii kulan ee ugu dambeeyay, halka lixdii kulan ee ka horreeyay laga dhaliyay kaliya 3 gool, taas oo ah tiro walaac leh ka hor kulanka Galatasaray, iyadoo kooxda Turkiga ay rajeyn karto fursad.
Si kastaba ha ahaatee, kooxda Slot waxay kaliya laba gool laga dhaliyay afartii kulan ee ay martida ahaayeen ee Champions League, taas oo muujinaysa inay si fiican uga ciyaaraan Yurub marka loo eego tartamada gudaha.
Be the first to comment