Tababaraha Liverpool, Andoni Iraola, ayaa ka hadlay guuldarradii 3-0 ahayd ee kooxdiisa kala kulantay Manchester City kulan ka tirsanaa horyaalka Premier League, kaas oo lagu ciyaaray garoonka Anfield.
Iraola ayaa sheegay in ciyaartu u ekayd laba kulan oo kala duwan, isaga oo ku dooday in Liverpool ay ahayd kooxda wanaagsanayd ka hor inta aan Ryan Gravenberch la siinin kaarka cas, halka Manchester City ay ciyaarta la wareegtay kaddib markii Liverpool ay toban ciyaaryahan ku hartay.
“Waxaan maanta ciyaarnay laba kulan. Kii koowaad wuxuu socday ilaa daqiiqaddii 60-aad, kii labaadna wuxuu bilaabmay kaddib kaarka cas. Kulankii koowaad annaga ayaa ka fiicnayn, laakiin wixii ka dambeeyey iyaga ayaa fiicnaa,” ayuu yiri Iraola.
Iraola oo ka horyimid casaankii Gravenberch
Tababaraha Liverpool ayaa si weyn uga soo horjeestay go’aankii garsooraha ee Ryan Gravenberch looga saaray ciyaarta, isaga oo aaminsan in qaladkii ugu horreeyey uusan mudnayn kaarka jaallaha ah.
Wuxuu sheegay in Elliot Anderson uu sii watay orodkiisa dhowr tallaabo kaddib qaladka, isla markaana uusan garsooruhu markii hore u muuqan inuu doonayo inuu qalad ku xukumo.
Iraola ayaa yiri: “Qaladkii ugu horreeyey ma uusan mudnayn kaarka jaallaha ah. Anderson wuxuu sii watay orodkiisa dhowr tallaabo, garsooruhuna markii hore uma muuqan inuu qaladba dhacday u arko. Ma garanayo sababta uu kaarka jaallaha ah u bixiyey, gaar ahaan annaga oo sagaal ciyaaryahan kubadda gadaasheeda ku haysannay.”
Wuxuu intaas ku daray in cadaadiska lagu saaro Manchester City uu adkaanayo marka labada kooxood ay min 11 ciyaaryahan yihiin, balse ay xaaladdu si weyn isu beddesho marka kooxdu tiro ahaan yaraato, Liverpool ayaa gool laga dhaliyey isla markiiba kaddib casaanka, ka hor inta uusan tababaruhu fursad u helin inuu beddello sameeyo. Iraola ayaa sheegay in marka kooxdu gool lagu leeyahay ay khasab noqoto inay qaab ciyaareedkeeda beddesho.
Inkasta oo Liverpool ay guuldarro culus la kulantay, Iraola wuxuu ammaanay bandhiggii Ryan Gravenberch, isaga oo sheegay inuu si wanaagsan uga ciyaaray dhinacyada weerarka iyo difaaca, Wuxuu yiri: “Maanta wuxuu soo bandhigay ciyaar aad u wanaagsan. Wuxuu ku fiicnaa kubadda oo uu horay ula socday iyo dhinaca difaacaba. Aad ayaan ugu faanayaa ciyaartoydayda.”
Tababaruhu wuxuu sidoo kale ku ammaanay ciyaartoydiisa dadaalkooda jireed, awoodda ay ugu dagaallameen kubadaha iyo sida ay uga qayb qaateen loollanka labada dhinac, Iraola ayaa sheegay in Liverpool aysan qeybtii hore u oggolaan Manchester City inay abuurto fursado badan oo halis ah, isla markaana kooxdiisu ay qeybtii labaad bilowday inay dadaalkeeda u beddesho fursado dhab ah.
Wuxuu xusay in kaarka cas uu yimid xilli Liverpool ay kordhinaysay cadaadiska, taageerayaashuna ay abuureen jawi aad u wanaagsan oo garoonka ah:- “Kaarka cas wuxuu yimid xilli aan ku jirnay waqtigeennii ugu fiicnaa. Faa’iidada ciyaartuna dhankeenna ayay u janjeertay, jawiga garoonkuna wuxuu ahaa mid aad u wanaagsan,” ayuu yiri Iraola.
Wuxuu taageerayaasha Liverpool uga mahadceliyey taageeradii ay muujiyeen, isaga oo sheegay inay garab istaageen ciyaartoyda xitaa kaddib markii kooxda laga saaray ciyaaryahan, Iraola ayaa sidoo kale ka hadlay xaaladda ciyaartoyda dhaawacyada qabta iyo fursadda ay ugu soo laaban karaan kulanka xiga ee Champions League.
Wuxuu sheegay in dhaawacyadu aysan u muuqan kuwo halis ah, laakiin kooxda ay laba maalmood gudahood ugu safri doonto Austria, taas oo adkayn karta in ciyaartoyda qaarkood ay diyaar u noqdaan kulanka xiga :- Wuxuu yiri: “Way adkaan doontaa, sababtoo ah waxaa jira laba maalmood oo keliya, laakiin qofna ma oga waxa dhici kara.”