Declan Rice Oo Digniin U Diray Liverpool Kadib Guushii Fulham.

Ciyaaryahanka khadka dhexe ee kooxda Arsenal Declan Rice ayaa digniin u diray Liverpool ka dib guushii ay ka gaareen Fulham.

Kooxda Mikel Arteta ayaa halkeedii kasii waday raadinta horyaalka Premier League kadib markii ay 2-1 kaga badiyeen Fulham garoonka Emirates.

Goolal ay dhaliyeen Mikel Merino iyo Bukayo Saka ayaa Arsenal ka caawiyay in ay helaan 3 dhibcood ee ciyaarta iyaga oo cadaadiska saaray Liverpool.

Arsenal ayaa haatan ku jirta kaalinta 2-aad ee kala saraynta horyaalka premier League iyada oo leh 61 dhibcood 30 kulan oo ay ciyaartay iyaga oo 9 dhibcood ka dambeeya kooxda hogaanka haysa ee Liverpool.

Kooxda Arne Slot ayaa ciyaaraysa fiidnimada Arbacada marka ay Anfield ku qaabilaan Everton kulanka Merseyside derby.

Kadib guushii ay Fulham kaga gaareen waqooyiga London, khadka dhexe ee Arsenal Rice ayaa uga digtay Liverpool in Gunners ay sii wadi doonto cadaadiska.

Isaga oo la hadalaya BBC Sport ayaa yidhi”Waan ognahay in aan iyaga ka danbeyno horyaalka, kaliya waxa aan xakamayn karnaa waxa aan samayn karno, taasina waa in aan badino siddeeda kulan ee noo hadhay”.

“Marar badan ayaan dhibco luminay xilli ciyaareedkan laakiin waxa aan sii wadi doonaa cadaadiska aan ku hayno iyaga taas ayaana ah waxa aan sameyn karno.”