Jamie Carragher ayaa sheegay in Arsenal ay ku jirto “boos aad u wanaagsan” oo ay ku soo afjari karto sugitaankeedii dheeraa ee horyaalka premier League waxaana caqabadda ugu weyn ee xilli-ciyaareedkan noqon kara Erling Haaland oo Manchester City ka tirsan.
Xitaa riyooyinkiisa ugu waaweyn kuma fikirin Mikel Arteta in uu heli doono toddobaad sidan u wanaagsan, iyadoo Manchester City, Liverpool iyo Chelsea dhammaantood la kulmeen guuldarrooyin lama filaan ah.
Eberechi Eze ayaa hubiyey in Arsenal ay si buuxda uga faa’iideyso fursadda, isagoo dhaliyay goolka kaliya ee ciyaarta markii ay 1-0 kaga adkaadeen Crystal Palace Axadii — wax ka yar laba bilood kaddib markii uu ka tagay Selhurst Park si uu ugu biiro Gunners.
Natiijadu waxay ka dhigan tahay in kooxda waqooyiga London ay afar dhibcood ku horreyso kooxda ku jirta kaalinta labaad ee Bournemouth kadib sagaal kulan, iyadoo sidoo kale leh rikoodhka difaac ee ugu fiican ee horyaalka, maadaama ay kaliya saddex gool laga dhaliyay.
Ragga uu hoggaamiyo Arteta – kuwaas oo ku dhammeystay kaalinta labaad saddexdii xilli-ciyaareed ee ugu dambeeyay – ayaa go’aansan doona inay xoojiyaan hoggaankooda horyaalka marka ay toddobaad gudihiis dib ugu soo laabtaan ciyaaraha Premier League, iyagoo u safraya garoonka Burnley oo dhibaato ku jirta.
Kooxda difaacanaysa horyaalka, Liverpool, ayaa hadda toddobo dhibcood ka dambeysa Arsenal iyadoo ku jirta kaalinta toddobaad, kaddib markii ay guuldaro 3-2 kala kulmeen kooxda Brentford taasoo ahayd guuldarradoodii shanaad ee lixdii kulan ee ugu dambeeyay.
“Taasi waa farqiga weyn ee u dhexeeya xilli-ciyaareedkii hore iyo kan: markasta oo Liverpool dhibco lumiso, Arsenal ma aysan ka faa’iideyn,” ayuu yiri difaacii hore ee Liverpool
“Waxaan ku muujinnay barnaamijkii Monday Night Football ee toddobaadkii hore in Arsenal ay guul gaartay markii Liverpool laga badiyey, waxaana ay hadda sameeyeen isla waxii ay markaas sameeyeen mar kale,” ayuu yiri Carragher.
“Waxay ku jiraan boos aad u fiican. Hal shay oo kaliya ayaa ka yaalla Arsenal iyo taageerayaashooda – sababtoo ah si aad ah ayay u rabaan horyaalka Premier League, waana muddo dheer oo ay sugayeen – waxay u muuqataa in sugitaanku uu noqonayo mid aad u dheer ilaa bisha May,” ayuu yiri Carragher.
“Waddadu waa dheer tahay, waxyaabo badanna way qaldami karaan, laakiin hadda, mar kale waan ku celinayaa — qaabka uu Premier League u socdo xilli-ciyaareedkan marka laga hadlayo kubadaha tuurista Iyo ciyaarta tooska ah Arsenal waa kooxda ugu diyaarsan ee la tacaali karta arrimahaas,” ayuu yiri Carragher.
“Arsenal xilli-ciyaareedkan waxay u soo galeen iyagoo ka walwalsanaa in Liverpool ay noqoto caqabadda ugu weyn ee ka hor istaagi karta dhammaadka sugitaankooda 21-sano ah ee cinwaanka horyaalka,” ayuu yiri Jamie Carragher, oo ku guuleystay Champions League sanadkii 2005.
“Laakiin hadda, cabsihooda ugu weyn waxay noqon kartaa Erling Haaland.
“Arsenal waxay haystaan kooxda ugu dhammaystiran ee tartamayaasha ka mid ah, halka Liverpool ay weli u baahan tahay inay hagaajiso dhibaatooyinkii hore loo ogaa. Dhinaca kale, Manchester City waxay haystaan ciyaaryahanka ugu saameynta badan uguna weerar wanaagsan.
“Haaland waa sababta ugu weyn ee kooxda Pep Guardiola ay fursad weyn ugu hayso inay dib u hantaan taajkooda. Haddii uusan jirin, yoolka ugu macquulsan ee City wuxuu ahaan lahaa inay ku dhammaystaan afarta sare.”
Be the first to comment