Kooxda Arsenal ayaa heshay war farxad leh oo ku saabsan dhaawacyada ka hor booqashadooda Premier League ee ay ku tegi doonaan Fulham, ka dib markii la arkay saxiixooda xagaaga, Piero Hincapie, oo ku soo laabtay tababarka kooxda koowaad.
Hincapie ayaa dhaawacmay kulankiisii ugu horreeyay ee uu u saftay kooxda, markaasoo uu beddel ku soo galay ciyaartii ay Arsenal 2-0 kaga adkaatay Athletic Club ee Champions League.
Xiddiga caalamiga ah ee reer Ecuador, oo kooxda kaga soo biiray Bayer Leverkusen xagaagan, ayaa seegay shantii kulan ee ugu dambeysay ee Arsenal kahor fasaxii caalamiga ahaa.
Laakiin daafaca 23-jirka ah ayaa haatan u muuqda mid diyaar u ah in dib loogu doorto kooxda, kaddib markii uu ka qeyb qaatay tababarka kooxda koowaad Khamiistii, isaga oo ay la joogeen dhowr ka mid ah ciyaartoyda kale ee ku soo laabtay.
Mikel Arteta ayaa la filayaa inuu bixiyo warbixin cusub shirkiisa jaraa’id ee Jimcaha, taasoo lagu ogaan doono in daafacaasi uu qeyb ka noqon doono kulanka Sabtida ee ay la ciyaarayaan Fulham.
Be the first to comment