Weeraryahanka Manchester City, Erling Haaland, ayaa ugu baaqay ciyaartoyda, taageerayaasha iyo shaqaalaha kooxda inay midoobaan, isla markaana niyadda wanaagsan ilaashadaan ka hor kulamada adag ee soo socda.
Haaland ayaa sheegay in kooxda ay tahay inay is garab istaagto oo ay guul u dagaallanto, xilli Manchester City ay Axadda booqanayso Liverpool garoonka Anfield kulan ka tirsan Premier League, ka hor inta aysan Arbacada la ciyaarin Paris Saint-Germain tartanka Champions League.
Xiddiga reer Norway ayaa sidoo kale muujiyay sida uu ugu xiran yahay Manchester City iyo taageerayaasheeda, isagoo sheegay inuu isagu sidoo kale yahay taageere kooxda ah, isla markaana uu fahmayo dareenka taageerayaasha.
Haaland ayaa kulanka Liverpool ku tilmaamay mid ka mid ah imtixaannada ugu adag, isagoo xusay inuu Anfield kula soo kulmay guul, barbaro iyo guuldarro, isla markaana kulamada Liverpool ay mar walba leeyihiin xiiso gaar ah.
Manchester City ayaa wajahaysa laba kulan oo culus, iyadoo marka hore la ciyaari doonta Liverpool Premier League, kaddibna u safri doonta kulanka Paris Saint-Germain ee Champions League.