Liverpool ayaa ka mid noqotay kooxo badan oo Yurub ah oo si dhow ula socda Niko Iličević, 15 jirka khadka dhexe ee weerarka uga ciyaara Eintracht Frankfurt.
Iličević, oo 16 sano jirsanaya dhammaadka Oktoobar, ayaa loo arkaa mid ka mid ah da’yarta ugu muhiimsan Frankfurt iyo Yurub. Liverpool iyo Bournemouth ayaa hadda ku biiray kooxaha daneynaya, iyadoo Manchester City, Barcelona, Real Madrid, AC Milan iyo Inter-na ay hore ula socdeen horumarkiisa. Bayern Munich, Chelsea, Tottenham iyo Newcastle ayaa sidoo kale lagu soo warramay inay xiiseynayaan.
Xiddigan reer Jarmal ayaa xilli ciyaareedkan sameeyay 3 gool iyo 3 caawin 6 kulan oo heer kooxeed ah, halka uu laba gool u dhaliyay xulka Germany U17 bishii September, mid ka mid ahna uu ka dhaliyay England.
Iličević waa ciyaaryahan bidixle ah oo ka ciyaari kara dhowr boos oo weerarka ah, waxaana uu durba kasoo muuqday kulamo uu la ciyaarayay ciyaartoy isaga ka waaweyn, isagoo sidoo kale gool ka dhaliyay UEFA Youth League.