Lionel Messi ayaa si qiiro leh uga hadlay go’aankiisa ah inuu soo gabagabeeyo waayihiisa xulka qaranka Argentina, isagoo sheegay inuu jeclaan lahaa inuu dalka u matalo inta noloshiisa ka harsan, balse uu hadda gaaray waqtigii uu macsalaameyn lahaa.
Messi ayaa yiri:
“Waxaan jeclaan lahaa inaan halkan, Argentina, weligay idinla joogo ilaa dhammaadka noloshayda, laakiin hadda waa waqtigii aan fariisan lahaa.”
Xiddiga reer Argentina ayaa sheegay in kadib Koobkii Adduunka ee ugu dambeeyay ay ahayd waqtigii uu bilaabi lahaa inuu macsalaameeyo xulka, isagoo carrabka ku adkeeyay in matalaadda Argentina ay ahayd sharafta ugu weyn ee noloshiisa kubadeed.
“Kadib Koobkii Adduunka ee ugu dambeeyay, waa waqtigii aan dhihi lahaa macsalaamo. Waad ku mahadsan tihiin, sababtoo ah matalaadda Argentina waa waxa ugu wanaagsan abid.”
Messi oo xusay dagaalkii Argentina ee Koobka Adduunka
Messi ayaa sidoo kale dib u xasuustay Koobkii Adduunka ee ugu dambeeyay, isagoo sheegay in Argentina ay finalka gaartay iyadoo ciyaartoydu ay haysteen tamar kooban, balse ay ilaa dhammaadkii u dagaallameen sidii ay mar walba sameyn jireen.
“Koobkii Adduunka ee ugu dambeeyay, waxaan finalka ku gaarnay wixii xoog ah ee naga haray, laakiin waxaan dagaallannay ilaa dhammaadka, sidii aan mar walba sameyn jirnay.”
Messi wuxuu sheegay in Argentina ay aad ugu dhowaatay inay mar kale ku guuleysato Koobka Adduunka, isagoo sidoo kale si xooggan uga hadlay hadalladii iyo shakigii laga sheegay kooxda.
“Waxaan aad ugu dhowaannay inaan mar kale ku guuleysanno, inkastoo wax kasta oo nalaga sheegay, wax aan caadi ahayn ma dhicin.”
Messi ayaa xusay koobabkii waaweynaa ee uu Argentina kula guuleystay, isagoo sheegay inuu si weyn ugu mahadcelinayo dhammaan dadka qaybta ka ahaa safarkiisa:- “Waxaan ku guuleysannay Koobka Adduunka, Copa América iyo Finalissima, Aad ayaan ugu mahadcelinayaa wax walba.”
Laakiin Messi wuxuu caddeeyay in guusha Argentina aysan ku koobnayn Koobkii Adduunka ee 2022 ama tartankii ugu dambeeyay, balse ay ahayd natiijada dadaal dheer oo ay sameeyeen ciyaartoy badan oo isaga ka hor iyo intii uu la joogay xulka:- “Safarkani ma ahayn oo keliya 2022 ama Koobkii Adduunka ee ugu dambeeyay, Ciyaartoy badan ayaa ila dagaallamay funaanaddan Argentina muddo dheer, ka hor inta aan anaga ugu dambeyn noqon horyaalka adduunka.”
Messi ayaa ugu dambeyn fariin u diray dhammaan ciyaartoydii isaga la soo wadaagay xulka, isagoo sheegay inaan marnaba la hilmaamin dadaalkii iyo naf-hurnimadii ay u sameeyeen Argentina:- “Waligiin ha ka shakin sida uu mid kasta oo iyaga ka mid ah ugu dagaallamay oo uu wax walba ugu bixiyay Argentina.”
Sidaas ayuu Messi ugu soo xiray bog muhiim ah oo ka mid ah xirfaddiisa, isagoo Argentina kula guuleystay Koobka Adduunka, Copa América iyo Finalissima, kadib sannado badan oo uu xulka la soo maray guulo, guuldarrooyin iyo waqtiyo adag.