Xiddiga kooxda Atlético Madrid iyo xulka qaranka Argentina, Julián Álvarez, ayaa raalli-gelin rasmi ah siiyay taageerayaasha kooxdiisa, kadib hadallo uu sheegay xilligii Koobka Adduunka ee la xiriiray rabitaankiisa ah inuu ka tago Atlético Madrid una wareego Barcelona.
Álvarez ayaa markii ugu horreysay si furan uga hadlay xiisaddii ka dhalatay suuqa kala iibsiga ciyaartoyda xagaagii lasoo dhaafay, markii uu muujiyay inuu doonayo inuu u dhaqaaqo Barcelona, balse maamulka Atlético Madrid uu diiday inuu fasaxo.
Hadalladaas ayaa caro xooggan ka dhex abuuray taageerayaasha Atlético Madrid, waxaana sii xumaaday xiriirka kooxda iyo Barcelona, maadaama xiddiga reer Argentina uu si cad u muujiyay rabitaankiisa ku aaddan inuu u wareego kooxda reer Catalonia.
Si kastaba ha ahaatee, Álvarez ayaa hadda isku dayaya inuu dib u kasbado kalsoonida taageerayaasha, isagoo raalli-gelintiisa jeediyay kadib markii uu dhaliyay goolkii guusha ee Atlético Madrid ay kaga adkaatay Deportivo La Coruña, kulan ka tirsanaa wareegga 10-aad ee horyaalka La Liga.
Isagoo la hadlayay warbaahinta kadib ciyaarta, isla markaana la guddoonsiiyay abaalmarinta xiddigii ugu fiicnaa kulanka, ayuu yiri:
“Waxaan doonayay inaan raalli-gelin siiyo taageerayaasheenna hadalladii aan sheegay intii lagu jiray Koobka Adduunka.”
Wuxuu intaas ku daray in waxa dhacay ay khalad ka ahaayeen dhankiisa, gaar ahaan habka uu hadalka u dhigay iyo waqtiga uu sheegay.
“Waxay ahayd khalad dhankayga ah, hadday noqoto qaabka aan wax u sheegay ama waqtiga aan sheegay. Waan fahamsanahay sababta ay taageerayaashu u xanaaqeen. Haddii aan anigu boosaskooda joogi lahaa, waxaan dareemi lahaa isla sidaas, gaar ahaan maadaama ay mar walba si weyn ii taageeri jireen,” ayuu yiri Álvarez.
Xiddiga reer Argentina ayaa sidoo kale ammaanay taageerayaasha Atlético Madrid, isagoo sheegay inay muujiyeen dulqaad iyo taageero weyn toddobaadyadii lasoo dhaafay, inkastoo ay jireen khilaafaadkii ka dhashay hadalladiisa.
Álvarez ayaa qiray in hadda ay saaran tahay mas’uuliyad ah inuu garoonka dhexdiisa ku muujiyo dadaal iyo horumar, maadaama kooxda ay horyaallaan tartamo muhiim ah oo ay doonayso inay guulo ka gaarto.
Dhanka xaaladdiisa ciyaareed, weeraryahanka ayaa sheegay inuu bilaabay inuu dareemo fiicnaan, isagoo uga mahadceliyay saaxiibbadiisa kooxda sida ay u garab istaageen muddadii uu ku jiray xaaladdan.
“Waxaan si adag uga shaqeynayaa inaan sii horumaro. Kulamadii ugu dambeeyay waxaan dareemayay horumar, dhinaca jirkayga iyo qaabka aan kubadda u ciyaarayo labadaba,” ayuu yiri.
Isagoo ka hadlayay taageerada iyo sacabka uu ka helay taageerayaasha, Álvarez wuxuu sheegay in xaaladda wanaagsan ee noloshiisa gaarka ahi ay saameyn ku leedahay qaab ciyaareedkiisa.
Wuxuu intaas ku daray inuu hadda dareemayo inuu diyaar u yahay inuu Atlético Madrid kala qeyb galo tartamada oo dhan, isla markaana uu doonayo inuu kooxdiisa ka caawiyo inay gaarto guulo waaweyn.
Ugu dambeyntii, markii wax laga weydiiyay sidii uu dib ugu kasban lahaa kalsoonida taageerayaasha, Álvarez wuxuu sheegay inuu rajeynayo inuu taas ku gaaro shaqo adag iyo is-hoosaysiin, isagoo mar kale uga mahadceliyay taageerada ay muujiyeen.