Weeraryahanka reer Norway ee kooxda Manchester City, Erling Haaland, ayaa dhigay labo rikoor oo waaweyn tartanka UEFA Champions League habeenkii Arbacada, ka dib laba gool ee uu ka dhaliyay kooxda Paris Saint-Germain kulan ka tirsanaa wareegga labaad ee tartanka.
In kasta oo City ay guuldarro 4-2 ah kala kulantay PSG oo laba gool oo degdeg ah dhalisay qeybtii hore, haddana Haaland ayaa muujiyay awoodiisa gool-dhalinta isagoo shabaqa taabtay daqiiqadaha 53-aad iyo 75-aad.
Rikoorrada uu jebiyay Haaland:
Ciyaaryahankii ugu dhakhsaha badnaa ee gaaray 60 gool: Haaland wuxuu u baahday kaliya 60 kulan si uu u dhaliyo 60 gool oo Champions League ah, isagoo ka hormaray Lionel Messi oo isaga u baahday 80 kulan si uu tiradaas u gaaro — taas oo ka dhigan inuu 20 kulan kaga hormaray xiddiga reer Argentina.
Goolhayaha ugu sareeya taariikhda Man City ee UCL: Labadan gool waxay ka dhigeen in Haaland uu noqdo gool-dhaliyaha koowaad ee taariikhda Manchester City ee tartanka Champions League, isagoo gaaray 38 gool, halkaas oo uu ku dhaafay rikoorihii hore ee Sergio Agüero oo ahaa 36 gool.
Intaas waxaa dheer, Haaland ayaa haatan si dhow u daba socda Mohamed Salah oo haysta rikoor-ka gool-dhalinta ugu badan ee ay ciyaartoyda katirsan kooxaha Ingiriisku ka dhaliyeen Champions League, kaas oo tiradiisu tahay 47 gool.