Halyeeygii hore ee Manchester United, Wayne Rooney, ayaa ka hadlay hadalladii daafaca reer Argentina ee Lisandro Martínez, kaasoo sheegay in kooxda ay u baahan tahay maalgashi dheeraad ah si loo xoojiyo safkeeda.
Rooney ayaa qiray in Martínez uusan soo bandhigin qaab ciyaareedkii laga filayay, balse wuxuu sidoo kale sheegay inuu qayb ahaan ku raacsan yahay aragtida ciyaaryahanka ee ah in Manchester United ay u baahan tahay inay xoojiso weerarka iyo difaaca.
Rooney ayaa yiri:“Qaab ciyaareedkiisu ma uusan gaarin heerkii laga filayay, laakiin waxaan u maleynayaa inuu dhinacyo qaarkood saxan yahay marka uu leeyahay kooxdu waxay u baahan tahay inay maalgashi dheeraad ah ku sameyso weerarka iyo difaaca.”
Wuxuu intaas ku daray inuu dareemay in hadallada Martínez ay u muuqdeen kuwo ujeeddo gaar ah laga lahaa, isla markaana aysan si buuxda ula jaanqaadin qaab ciyaareedkii uu isagu arkay:- “Laakiin waxaan u maleynayaa inay u muuqatay inuu jiray ajande gaar ah, uuna doonayay inuu sidaas sheego, sababtoo ah taasi kama tarjumayso qaab ciyaareedka, Aniga waxay ila ahayd in qaab ciyaareedku ka fiicnaa.”
Hadallada Rooney ayaa muujinaya in inkastoo uu taageeray baahida Manchester United u qabto xoojin, haddana uu su’aal geliyay waqtiga iyo ujeeddada hadallada Martínez.