Pedri Oo Barcelona Ku Hogaamiyay Guul Ay Ka Gaadheen Getafe

Gool uu qeybtii hore dhaliyay Pedri ayaa ka caawisay Barcelona inay 1-0 kaga badisay Getafe iyagoo sii dheereystay hogaanka horyaalka La Liga oo ay ku hayaan lix dhibcood.

Kooxda Xavi ma aysan soo bandhigin qaab ciyaareed fiican gaar ahaan dhanka weerarka waxayna ku dhibtoodeen inay tijaabiyaan goolhaye David Soria, laakiin waxay ku guuleysteen inay badiyaan kulankoodii 7aad ee gurigooda ee sagaal jeer oo ay isku dayeen.

Kooxda martida aheyd ee Getafe ma aysan haweysanin inay weerar qaado, waxayna ku soo tashadeen kubad difaaca ah iyagoo ku dheelayay shan difaac, waxayna liqeen cadaadis kasta oo uga imaanayay Barcelona.

Waxaase jirtay gool laga diiday afar daqiiqo markii ay ciyaarta socotay iyadoo Borja Mayoral uu shabaqa soo taabtay laakiin Enes Unal ayaa gool ka hor offside ahaa.

Dhanka kale Barca waxaa lagu xadiday inay darbooyin meel fog ka soo tuuraan iyadoo goolhaye Soria uu fursado ka beeniyay Ousmane Dembele iyo Gavi. Laakiin waxaa ugu danbeyn shabaqa ka soo taabtay Pedri daqiiqadii 34aad kaasoo baas ka helay Raphinha.

Getafe ayay aheyd inay barbareyso ka hor dhamaadkii qeybta hore markii Pedri uu kubad u dhiibtay Mayoral kaasoo darbadiisa ku aadiyay goolhaye Marc-Andre ter Stegen.

Qeybtii labaad ciyaarta si la mid ah ayay u dhacday iyadoo tababare Quique Sanchez Flores uu diiday inuu qorshihiisa ciyaareed wax ka bedelo.

Qeybtii labaad ciyaarta waxay noqotay mid caajis ah iyadoo fursado badan aan la kala helin halka kubad Mayoral uu banaanka mariyay ay aheyd fursada kaliya ee ugu fiicneyd ee la abuuray.

Guushaan waxay ka dhigeysaa in Barcelona ay horyaalka ku hogaamineyso lix dhibcood ka hor kulanka Real Madrid ee caawa.

Be the first to comment

Leave a Reply

Your email address will not be published.


*